Wasira: CCM Itaendelea Kushika Dola Kwa Sababu ya Sera Zake Bora

Wasira: CCM Itaendelea Kushika Dola Kwa Sababu ya Sera Zake Bora*  

Makamu Mwenyekiti wa Chama cha Mapinduzi (CCM), Stevin Wasira, amesema chama hicho kitaendelea kushika dola kutokana na sera zake bora zinazolenga kuboresha maisha ya wananchi, huku akisisitiza kuwa vyama vya upinzani haviwezi kushindana na CCM kwa sababu ya migogoro ya ndani na ukosefu wa mshikamano miongoni mwao.  

Akizungumza leo, Januari 23, 2025, mbele ya mamia ya wakazi wa Dodoma, Wasira alisema, "CCM itaendelea kushika dola kwa sababu tumejidhihirisha kupitia utekelezaji wa sera bora zinazogusa maisha ya wananchi moja kwa moja. Wananchi wanajua tuna uwezo wa kusimamia maendeleo endelevu kwa vitendo."  

Aliongeza kuwa vyama vya upinzani haviwezi kuwa tishio kwa CCM kwa sababu kabla hata hawajafika Ikulu, wanashikana mashati kwa migogoro ya ndani, hali inayoonyesha kutokuwepo kwa umoja na maono ya pamoja. "Hakuna majaribio ya kupeana zamu ya Ikulu kwa kubahatisha; wananchi wanahitaji uthabiti, uzoefu, na uongozi wenye dira, mambo ambayo CCM inayo," aliongeza.  

Wasira pia aliwahimiza wakazi wa Dodoma na Watanzania kwa ujumla kuendelea kuwaunga mkono viongozi wa CCM katika uchaguzi wa mwaka huu wa Rais, Wabunge, na Madiwani. Alibainisha kuwa CCM ina dhamira ya kuendeleza mafanikio makubwa yaliyopatikana chini ya uongozi wa Rais Samia Suluhu Hassan.  

Kauli yake imepokelewa kwa shangwe na wakazi waliohudhuria mkutano huo, huku akiwahakikishia kuwa CCM itaendelea kusikiliza na kushughulikia changamoto za wananchi kwa uwajibikaji na uadilifu. "CCM ni chama cha watu, na tutaendelea kufanya kazi kwa ajili ya wananchi kwa misingi ya haki, maendeleo, na mshikamano," alihitimisha Wasira.